29.2.08

ياترى أيه إختيارنا؟؟؟


"لا خير فى متعه يتبعها ندم"
يعنى لو إنت عايز تعمل حاجه أى حاجه عموماً
وعارف ومتأكد وباصم بالعشره
إن الحاجه اللى ناوى تعملها غلط
وبالرغم من كده هتموت وتعملها
وعارف برضه ومتأكد وباصم بنفس العشره
إنك حتندم بعد ما تعمل الحاجه دى
أنصحك بقى نصيحه متجربه
أبعد عن الغلط ومتقربش له
لأنك لو عملته هتحس بالمتعه لحظه مابتعمل كده
والمتعه دى هتنتهى بإنتهاء أسبابها
لكن نهايتها هتبقى بدايه لحاجه جديده
تقولى ايه اللى ممكن يبدأ؟
أقولك شعورك بالندم هو اللى هيبدأ
ومتستهونش بالندم
لأنك مش ممكن هتقدر تتخلص منه
سواءاً صاحى أو نايم
أو عامل نفسك مشغول
حتلاقى قلبك بيوجعك
وعمال تقول ياريت اللى جرى ما كان
وطبعاً كلامى للناس اللى لسه ضميرهم صاحى شويه
مش الناس اللى ضميرهم واخد تعسيله
تعمل أيه بقى علشان تخلص من كل ده؟
أقولك،ِ نرجع الأول للبدايه
وبالتحديد فى اللحظه اللى حتقع في الأختيار
بين الفعل مسبب المتعه
وعدم الفعل اللى هو مخالف هواك طبعا
أسال نفسك سؤال بسيط
لكن حيريحك ويطلعك من الحيره
أعمل الحاجه دى وأرضى نفسى
ولا معملهاش وأرضى ربنا؟؟؟؟
شوف بقى ترضى مين
بسم الله الرحمن الرحيم
"أم حسبتم أن تدخلوا الجنه ولما يعلم الله الذين جاهدوا منكم ويعلم الصابرين"
صدق الله العظيم
مجاهده النفس مش حاجه سهله
.ولا الجنه سهله يانااااااااااااااااس

12 comments:

الأستاذ said...

والله دي أصعب حاجة
حتى لو مش موضوع إن الحاجة دي هتغضب ربنا بس
لأ فكرة مجاهدة النفس في حد ذاتها صعبة ومجزية جداً
لأن مجاهدة النفس دي في الصدقة كمان
الواحد لما يجيي يتصدق لو طلع حاجة هو ضخصياً بيحبها وحاجة نظيفة ومحترمة مش "صدقة" وخلاص زي م بنقول هيلاقي إن صعب عليه يستغنى عن الحاجة دي في حين إنه لو مطلعش صدقة أصلاً مش غلط
الجنة فعلاً طريقها مش سهل في الزمن ده لكن الطريق معروف إحنا اللي مش بنحب نمشي إحنا عايزي مواصلات
مع أطيب تمنياتي بعدم الشعور بالندم مرة أخرى
تحياتي

Desert cat said...

فعلا يا منمووووون
مجاهدة النفس دى حاجه صعبة اوى
ومش يقدر عليها غير الانسان الصابر والمؤمن اللى شايف ربنا قدامه فى كل وقت
ربنا يجعلنا منهم
محبتى يا جميلة

صالح سعيد said...

انا معاكى اننا بنعيش فى زمن فى ناس كتير جدا ضميرهم مستتر
ولو كل واحد فكر انه يحاسب نفسه قبل مينام عمل ايه صح وايه غلط هيرتاح
قبل ان ياتى عليه يوم لا يفيد فه الندم
ربنا يزيدك من نعيمه ويوفقك
صباح الورد يا منون

صوت من مصر said...

صعب جدا
دى معادله مفقوده بين الناس فى الزمن ده

(احمد سكر ) said...

مجاهدة النفس فى حجات كتير اوى

الاذان بيأذن

وانت قاعد عاوز تقوم

الشيطان يوسوس

استنى شويه

انت عاوز تقوم تصلى

نفسك تقولك مش مهم صليها بعد شويه

انت عاوز تلحق الجماعه

نفسك تقولك صليها فرد ف البيت

وتنتصر نفسك فىاغلب الاحيان

وتفوتك الجماعه

وترجع تأنب نفسك

تحياتى عزيتى

وتقبلى مرورى

احمد سكر

mnoon said...

المواصلات كتير ومش زحمه
بس إحنا اللى مش عايزين نركب
وعلى قد ما بتجاهد نفسك
على قد ما بتاخد أجر
ومدام فيه مواصلات يبقى لازم تركب
وشكراً على زيارتك الجميله لمدونتى
وأتمنى تكررها
سلاااام

mnoon said...

desert cat
بس إحنا لازم نشوف ربنا معانا كل وقت
ويكون اللى بيحكم تصرفاتنا دايما
ربنا مش صحابنا ولا أهلنا ولا أى حد
وفعلاً الموضوع صعب
بس لازم يكون فيه شويه مجاهده
ربنا يوفقك ياقطه
سلاااااام

mnoon said...

صالح سعيد
منور مدونتى
فعلاً ياريت كل واحد يحاسب نفسه
كويس قبل ما ينام
والأحسن إنه ميستناش لحد بالليل
يحاسب نفسه أول بأول
ويارب يجعلنا كلنا من الناس دى
تحياتى إليك

mnoon said...

صوت من مصر
طيب هى علشان المعادله مفقوده
يبقى نطنش
ونتمادى فى أخطائنا؟؟؟
شكراً على أهتمامك بالتعليق فى مدونتى

mnoon said...

سكر
طبعاً اتقبل مرورك
وأتمنى إنه يتكرر
أما عن الصلاه والوسواس
فلازم نكون أقوى من الوسواس
وأشطر منه
ونحسبها كده
ياأنا ياشيطانى
وزى ما بنحب نكسب فى كل حاجه
لازم نكسب فى الحاجه دى
ونغلب الشيطان
سلاااام

SomeOne said...

الندم نفسة شيء غلط
يجب ألا نفعلة


لاتندم على ما فات


ولا إية
؟؟؟

mnoon said...

شادى فايد
هو دا اللى أقصده
إن الواحد مننا يفكر كويس
قبل ما يأخد أى خطوه فى حياته
علشان يحمى نفسه من الندم
وأنا سعيده جداً بزيارتك