موجوده أنا

موجوده أنا
لسه والله موجوده

...........

:):):)

أجــــــــــــــــازه فرحى

مقصره قوووووى فى حق مدونتى

ومش بزور مدونات إعذرونى ياجماعه

إصلى أنا فى حاله حب عقبال عندكم

بحب وخلال أيام تتعد على صوابع الأيد الواحده هتجوز

وخلال الفتره الجايه مدونتى فى أجازه

أجـــــــــــــــــــــــــازه فرحى

دعواتكم لينا بقى

ثقافه الطبيخ المصريه

ستانلس..........

وميلامين..........

وصينى..........

وبيركس.........

وإيكروبال.........

وألومنيوم.........

دول اللى سمعت عنهم وما خفى كان أعظم

بناتك يامصر مقتنعين جداً

بإن أقصر طريق لقلب جوزك معدته

فكل مانزود فيما يخص الطبيخ والمطبخ

وما يتعلق بالمعده فبكده بنزيد المحبه

حبايبى البنات المظلومين طالبين المحبه مش أكتر

والبنات هنا مقصود بيهم

العروسه وامها وأختها وحماتها كمان

ما هو لو ناقص حله حماتها مش هتنساهلها العمر كله

لازم المطبخ

يكون متستف _ حاجات_معرفش لزومها إيه

وهتستخدمها أمتى؟

وكأن العروسه من كتر محبتها لجوزها

مش هيكون ورها شغلانه

غير إنها توكله

دا حتى الرسول بيقول " بحسب إبن أدم لقيمات

صغيره يقيمن صلبه" صدق رسول الله

لقيمات تصغير لقمه

أه بس يارسول الله لو جيت شفت الهنا اللى إحنا فيه

حلل متعدش كل الأنواع والخامات

والكوبايات والكاسات

وشنط السكاكين والمعالق والشوك

ولا النيش دا لوحده مصيبه لازم ينزلها توبيك لوحدها

مش وقته دلوقت

ده هو كل إستعداد العروسه وأهلها لحياتها الجديده

نسينا حاجات كتير فى وسط زحمه الجهاز

نسينا نحدد هدفنا من الجواز إيه؟

ياترى لما بنفكر فى الجواز بنفكر فيه ليه

ماإحنا لو حددنا إحنا هدفنا إيه؟

يمكن نفهم اللى بيجرى

هدفنا شبكه وشقه وفستان وفرح

ولا هدفنا إيه بالظبط؟؟؟؟؟؟؟؟؟؟؟؟؟؟؟؟؟

خلااااااااااااص

...................

وأكلتها حته بسكوت صغيره جداً

متشبعش طفل صغير

وشربت شويه عصير برضه ميشبعوش طفل

ونامت فى حضنى

ويادوبك عدلنها على المخده بالعافيه

................

بعدها بأقل من 5 دقايق

كانت ساكته خالص

وبتبص فى السقف ومش بتتكلم ولا بتتحرك

ولا بتستجيب لأى حد بينده لها

.............

خلاص حد يلقنها الشهاده

دى الكلمه اللى كنت بسمعها من الكل

معرفش فى المواقف دى المفروض أتصرف إزاى

بس كنت بردد الشهاده فى ودنها

وهى مازالت بتتنفس بس برضه ساكته خالص

فى دنيا غير الدنيا

ياترى هى حاسه بإيه وشايفه إيه؟

دا سؤال كان فى دماغى ساعتها

وكانت صعبانه قوى عليا

وصعبان عليا نفسى لما هكون فى نفس المكان

ياترى هى حاسه بإيه دلوقت؟

........

بعدها بشويه

جه الدكتور

وبعدها جات واحده ست جارتنا

طردتنا كلنا من الأوضه

بس أنا عرفت بعدين هى كانت بتعمل لها إيه

ربطت لها رجلها فى بعض

وحطت إيديها جنبها

وربطت راسها بطريقه معينه

وغطت وشها

................

خلاااااااااااااااااص

البقـــــــــــــــــــــــــــــــــــــــــــــــاء لله

.

الساحره المستديره

................

................

شروق لا أنتظره

إستريحى أيتها الشمس من عناء إشراقك كل يوم

فلن أرجوكى بعد اليوم أن تعجلى بالغروب من أجلى

وأنت الأخرى أيتها الساعات مرى كما يحلو لكى أن تمــــــــرى

وإن أردتى أن تتوقفى قليلاً فلتتوقفى للأبد

لن أغضب بعد اليوم منك

فلا يوجد بالحياه ما ينتظر

.......

تاج تاجين قول تلاته

فزلوكه كانت مررت لى تاج من مده طويله

وكعادتى فى الأستعباط عملت مخدتش بالى

لكن صوت من مصر مرر لى نفس التاج وزودلى عليه كمان واحد

وحصل إن دعاء برضه عملتها فيا وبعتت نفس التاج

ولذلك قررت أجى على ذات نفسى وأجاوبهم


التاج الأول

اذكر 6 اسرارقد لا يكتشفها من يقابلك لاول مره ؟

بيبان عليا جاده قووووى وكشريه

رغم إن اللى يعرفنى يعرف إنىمش كده

يعنى بحب الضحك والتهريج بس مش مع أى حد طبعاً

بيبان عليا بارم ديله وأنا بتكلم
رغم إنى من أسره بسيطه جداً

اللى يقابلنى أول مره مش بيعرف إنى ليا أى علاقه بعالم النت

والمدونات والفيس بوك

ممكن فى اللقاء الأول يتاخد عنى إنطباع إنى مغرووووره

وده نتيجه إنى بختصر جداً فى حواراتى مع الناس اللى معرفهاش

إيه تانى ياترى؟؟؟؟

اللى يقابلنى ممكن ميعرفش

منكم لله ياللى بعتوا التاج

هو أنا هدخل فى عقول الناس وأقولهم إنتوا شايفنى إزااااى

عموماً هبقى أسأل وأرد عليكم فى بوست تانى


اذكر 16 صفه عن نفسك ؟

يادى النيله إشمعنا 16

طيبه وغلبانه وديماً متفائله وببص للنص المليان فى الكوبايه

طموحه جداً وحالمه وهااااااااااديه لدرجه البرود

وكتومه وإنطوائيه جداً ومش أى حد برتاح معاه

وعندى قدره عاليه على التحكم فى ذاتى وأفكارى

وبيأس بسرعه بس مش بستسلم لليأس أبداً

فاضل سته يامسهل يارب

مطيعه وبسمع الكلام

بس فى الأخر بعمل اللى فى دماغى <سوسه>يعنى

لا بجد لو إقتنعت إنى غلط مش بتردد إنى أعترف إنى غلط

عندى مرونه فى أفكارى وأحلامى

فى الغالب غير ملتزمه بمواعيدى

لاء ، ديماً للصراحه

وكمان إيه تانى بقيت مش بعرف أكمل حاجه للأخر

وأنا مكنتش كده وده شئ مضايقنى قوى الأيام دى

ولما بحس إن فيه حاجه ممكن تذلنى بستغنى عنها للأبد للأبد

وبتكيف مع حياتى وبعيش فى أى ظروف

أعتقد إن كده ال 16 صفه خلصوا

ندخل على اللى بعده


ومن رأيى كفايه كده علشان أنا تعبت نكمل السنه الجايه إن شاء الله

:)

مش بقولكم أنا مبقتش أكمل حاجه للأخر

حد يشوفلى حل قبل ما أقفل المدونه دى

عــــــــــــــــــــادى بقى

رفعت الرايه البيضا

ورضيت بكل حاجه

وبأى حاجه

ومن أى حد

خلاص مش زعلانه من حد تانى

خدوا راحتكوا وزعلوا فيا

متاخدوش فى بالكم

أنا مسمحاكم

دا لو كان فى يوم سماحى يهمكوا

وبراحتكوا زعلوا فيا

مش بقولكوا خلااااااااااص

.رفعت الرايه البيضا للحياه

........

V I B

حد كان مش موجود وبقى موجود

حد كنا عايشين من غير عادى

ودلوقت بقى غيابه بيفرق معانا

كتير اللى بيدخلوا حياتنا وبيخرجوا

.من غير ما نأخد بالنا منهم أصلا

لكن فيه كده نوعيه قليله ونادره

بتدخل حياتنا وبتفرض وجودها

وكمان بتتحول لأشخاص مهمه قوى

VIB

تفتكروا ليه؟؟؟؟؟

.

شط إسكندريه

فضلت أحاول أكتب موضوع متفائل

يعبر عن حالتى النفسيه المتفائله

لكنى بصراحه عجزت

المهم قلت لازم أنزل بموضوع متفائل

وبمناسبه الصيف والحر والأجازه

فكان لازم أفتكر إسكندريه

وحكاياتى معها اللى لا يمكن أنساها

إفتكرت لما إتفقنا أنا وصحابى

نروح إسكندريه

وإفتكرت
لما إتفقنا نلعب كوره على الشاطئ

وبما إنى مش بفهم فى الكوره

فقد قمت بإستبعاد نفسى أوتوماتيكياً

من المشاركه فى اللعب منعاً للإحراج

وبدال ما أكحهلها عميتها

وقال إيه قمت بدور الحكم والمعلق فى نفس الوقت

وكنت مفكره بصراحه الموضوع سهل

ولا يتعدى إن أقعد على الكرسى

وأمسك الميكرفون

أقصد حاجه تشبه الميكرفون

وأقول الكوره مع سلوى

ومنها لبسمه

وجوووووووووووون

كنت مفكره الموضوع كده وبس

لحد ما الفريقين وقعوا مع بعض

فريق شايف إنه جاب جون

والفريق المنافس المفترى شايف إنها جات فى العرضه

وطبعاً ظهر دورى كحكم

وبجد حسيت عندها بنفسى وبدورى المهم اللى إخترته فى اللعبه

بدون قصد

أجى بقى لحل المشكله

الكوره جات جون

ولا فى العرضه

عـــــــــــــرضــــــــــه!!!

هى فين صحيح العرضه دى

اللى بيقولوا الكوره جات فيها

أصلاً الجون محددينه بكومين رمل مش أكتر

يعنى وجود العرضه شئ وهمى

وطبعاً لإننا مش ملتزمين بوقت

فالموضوع طول

وقلتلهم سيبونى أفكر

وفتره التفكير عندى كانت بصراحه

مليانه بالإغراءات

فريق يبعتلى مندوب ويقولى هنسقيكى حاجه ساقعه على حسابنا

وفريق يقولى طلباتك أوامر

وطبعاً لأنى صاحبه مبادئ

لايمكن أغير مبادئ

وفى وسط خناقه الفريقين ودوشتهم

قررت

قررت إيه؟؟؟؟؟؟

إن الكوره جات فى العرضه

أه جات فى العرضه

وكملت التعليق على الماتش

وأنا بمزمز ميراندا

وأكيد إنتوا فهمتوا جات منين

وعقبال المصيف الجاى

مرحباً بكم فى الحياه

ماذا تفعل

حينما تفقد الثقه فى الأخرين؟

وماذا تفعل حينما تفقد الثقه حتى فى أفكارك وتصرفاتك ؟

ماذا تفعل حينما تجد أن المشاكل قد إجتمعت حولك

ورفضت أى محاوله لإبتعاد عنك ولو لقليل؟

ماذا تفعل حينما تتحدث كثيراً

وبالرغم من ذلك

لا تصل فكره من أفكارك لمستمعيك؟

ماذا تفعل حينما تشعر بالظلم من إناس تكن لهم كل الحب والإحترام؟

ماذا تفعل حينما تشرع فى البناء

وتجد متعه الأخرين الوحيده هى الهدم ؟

هل الحل أن تصبح وحيداً

أما أن تصير بعيداً

عن كل من تعرفهم وعن الحياه نفسها؟

إن الثقه فى الأخرين وهم كبير

فالأخرين مهما فعلوا أخرين

.........

عروسه من غير شبكه

من فتره نزل بوست فى مدونه كلمتى

لدعاء عاطف

إسمه رفقاً ياعمى رفقاً

عن المغالاه فى طلبات أهل العروسه

ونادت دعاء بحمله نعملها نسميها عروسه من غير شبكه

وبالفعل

نزلنا الشارع وأتكلمت دعاء مع الناس

وسجلت أراءهم كمان

وإتناقشت مع دكاتره الجامعه فى الفكره

واللى قرروا يدعموا الفكره معنوياً

المهم

أيامها بقى عرفت الفيس بوك

والجروبات اللى فيه

وعملنا جروب إسمه عروسه من غير شبكه

ولاقى الجروب إقبال سريع لدرجه إننا لسه مكملناش شهر وبقينا أكتر من 700

بين ومؤيد ومعارض

عنوانا عروسه من غير شبكه

لكن هدفنا زواج بدون تكاليف مبالغ فيها

زى

الشبكه

والشقه

والعفش

وتكاليف الزفاف

وباقى التكاليف دى

الفكره إتنشرت على الفيس بوك

وإتكلمت عنها فى العاشره مساءاً

وإذاعه البى بى سى

الموضوع كبر قوى وكتير مقتنعين

وبرضه فيه معترضين

إحنا لسه منتظرين الأمتحانات تخلص

ونبدأ ورشه عمل

علشان نقول أهدافنا إيه بالظبط وإزاى نوصلها

بتمنى من كل اللى يدخل هنا

على المدونه المسكينه دى

يشارك معانا على الفيس بوك

ويشارك كمان من خلال مدونته

بإيه بقى؟

تشاركنا برأيك أياً كان من خلال مدونتك

وتدعو صحابك إنهم يشاركوا من خلال مدونتهم

أطلق لقلمك العنان

وإكتب إيه اللى شايف إنه مبالغ فيه تكاليف الزواج

وكل واحد يكتب بطريقته

وبس

لحـظــــــــــات معتـــــــــــاده

لحظات معتاده

تحولت فجأه إلى لحظات مميزه

ترى أين يكمن سر هذا التحول المفاجئ؟

هل كانت بطبيعتها لحظه مميزه

ولكننا كنا نتجاهلها كعادتنا دائماً

تجاه كل ماهو جميل بالحياه

ربما

ولكن لماذا لم تلاقى هذا القدر من التجاهل

التى إعتادت أن تتلقاه منا

هل هى فعلاً مميزه عن غيرها؟

أما أن سرها يتوارى خلف رغبه داخلنا

لأن نرى كل شئ مميز بالحياه؟

حقاً .....لا أعلم سر تحولها إلى الأن

وربما أكتشفه يوماً ما

وإلى أن أجده

سأظل أعتب عليك ياسرى الصغير إختفائك عنى

فلتعلن عن نفسك بوضوح أرجوك

حتى أرى من خلالك كل لحظاتى مميزه

فقد سئمت من كل ما هو إعتيادى بالحياه

فلا تبخل عليا بالوضوح أكثر من ذلك

...........

3%تخيلوا بس

يقال إن 3% من العالم

هم بس اللى عارفين هم عايزين إيه من الحياه

وهم اللى قادرين إنهم يغيروا العالم

وإنه طالما الواحد مش عارف

هو لما حيصحى من النوم

حيعمل إيه؟

يبقى مش حيكون عنده رغبه يقوم من النوم أصلاً

ولذلك قررت أفكر شويه ياترى أنا لما أصحى من النوم حعمل إيه؟

؟؟؟؟؟؟؟؟؟؟؟؟؟؟؟؟؟؟؟؟؟

شويه كتمااااااااااااااااااان

سمعت خبر حلو

فرد فعلك الطبيعى هيكون فرحه

هتبان على وشك

طب سمعت خبر وحش

نفس النظام هزعل وهضايق

وأكيد هيبان علي وشى إنى حزين

طيب حد قالك حاجه نرفزتك

أكيد هتنرفز عليه

كل اللى فات دا كان ينفع زماااااان

دلوقت بقى فيه حاجات تانيه خالص

خليكوا معايا يمكن تستفادوا حاجه للزمن

لو حد فى يوم صدمك بخبر منيل بستين نيله

وحسيت كأن شاكوش ضربك على دماغك

إعمل نفسك عادى

عادى جداً ولا يهمك إثبت بس قدامه

وإعمل نفسك متضايقتش

وكمل حوارك ومتخليش حد يلاحظ صدمتك

لو فى يوم حسيت نفسك حزينه قوى

وعندك مشاكل الدنيا والأخره

فوق دماغ حضرتك

وفجأه لقيت نفسك وسط ناس فرحانه قوى

ومبسوطه قوى

مطلوب من حضرتك إيه؟

مطلوب منك تضحك وتشارك بالفرحه كمان

وميبانش عليك الغم

طيب لو حد وحشك قووووووووى

ونفسك تتصل بيه وتقوله

وحشتنى ياللى مش بتحس ولا بتفهم

ونفسى أشوفك

ياترى ممكن تعمل إيه؟

طنشه ومتسألش عليه

وإشغل نفسك بأى حاجه

يمكن تنسى أنه بجد وحشك

ولو حصل وسأل عليك هو

وربنا كرمه وجات منه هو

إحمد ربنا الأول

وبعدين كلمه عادى جداً ببرود يعنى

ولا كأنك كنت هتموت على إتصاله

ولا كنت متوقع منه مكالمه من أساسه

لو قلقان ومنتظر حاجه معينه

خلى وشك يعبرعن أى حاجه تانيه غير القلق

خليه مثلا يعبر عن إرتياح

أهو أحسن ما يبان عليك القلق

وتصعب على اللى حوليك

ودا يرميك بنظره شفقه

ودا يقولك كلمه تقلقك أكتر وهو مفكر إنه بيطمنك

طب لو مبسوط بقى والظروف رماتك

فى وسط ناس مهمومه

وفشلت إنك تغير مزاجهم للأحسن

يبأه مش قدامك غير إنك تمشى وتسيبهم

أو إنك تعيش معاهم اللحظه

وتتغم على عينك زيهم

وتخلى فرحتك بينك وبين نفسك

وتكتمها جواك

ويمكن على نهايه القعده تكون نسيت إنك كنت مبسوط

وقيس على كده حاجات كتير فى حياتنا

وطبعاً الموضوع مش سهل

الحكايه دى محتاجه تدريب كتير

دا مش نفاق ياأصحابى

دا حفاظ على مشاعرنا اللى بهدلناها معانا

بهدلناها من كتر ما بالغنا فى إظهارها بصدق

مشاعرنا وإنفعالاتنا البسيطه حاجه خاصه قوى

متبنش قدام أى حد بسهوله

وبينك وبين نفسك خد بالك من حواراتك

خادع نفسك يعنى

لو نفسك قالت لك حاجه مش عجباك سيبك من كلامها

لو قالتلك : أنا متضايقه وزهقانه

قلها : لا دا مبسوطه قوى ياروحى

ولو قالتلك : دا خبر زى الزفت

قلها : وعسى أن تكرهوا شيئاً وهو خير لكم

ولو قالت : دا إحنا خدنا مقلب كبير

قلها : دا إحنا كنا بنتعلم

ولو قالت : الدنيا وحشه والناس أوحش

قلها : إنتى اللى فهمتى الدنيا والناس غلط

ولو ردت عليك وقالت : زهقت منك

قلها : قلها وأنا بحبك ومتمسك بيكى ياروووووووحى

أصدقائى المدونين والمدونات

إزيكم يا أصدقائى

اللينك دا لازم تدخلوا عليه

لأنه فرصه متتعوضش

وكان لازم أعرفكم

ومحتفظش بالسر دا لنفسى

http://www.facebook.com/group.php?gid=13820826455

تاااااااااااااااااااااااااااااااااااااااااج يافرحتى

التـــــــــــــاج دا جالى من كلمتى دودو ياجماعه

صديقتى الانتيم

وجالى تانى من ديــــــــــــــنا

اللى هنبقى أصحاب إن شاء الله

وعلى فكره كنت هبعته ليكى يادينا

قواعد التاج

اولا:اذكر عشرة اشياء عن نفسك

ثانيا:اختر خمس اشخاص تهدى لهم التاج

ثالثا:لا تهدى التاج لمن اهداه اليك

رابعا:عرف اللى بعتلك التاج انك نزلته عندك

اولا:عشر حاجات عن نفسى

أولاً : إسمى منى زكى حياتى اللى فاتت مفيهاش حاجه جديره بالذكر

غير إنى خدت بكالوريوس تجاره قسم محاسبه بتقدير مقبول

ثانياً:بحب الحريه وعارفه معناها ومتحمله مسئوليه الحريه الى بتمتع بيها

ثالثاً : أكتر صفه بحبها فى نفسى إنى بعمل ديليت لأى حاجه فى الدنيا

ممكن تضايقنى؛ ومش بسمح لأى حد ولأى حاجه إنها تأخد من تفكيرى وقت كبير

يعنى ممكن أسيب حقى مقابل إنى أحس بالهدوء والأمان وأريح دماغى من المشاكل

وممكن أستغنى للأبد وبرضايا عن حاجات مهمه جداً بالنسبه لى

لو حسيت إنها جات على كرامتى

رابعاً : أكتر صفه بكرهها فى نفسى إن حماسى لأى موضوع

بيتولد وبيموت فى نفس اللحظه؛ مش عارفه أنا ليه كده؟؟؟؟؟

خامساً : مش عارفه أتحرر من إحساسى بإنى مازالت طالبه

سادساً : بكره المشاكل والنكد والصوت العالى

والجدال وعلشان كده بهرب من مشاكلى ومش بحب أوجهها

سابعاً : صعب جداً جداً إن الدموع تنزل من عينى

دموعى قريبه جداً لكنى بتحكم كويس في نفسى علشان محدش يشوف دمعه واحده منى

ثامناً : إنسانه غير إجتماعيه بالمره

بكره الكلام وبحب الصمت

علشان كده مش بحب أتعامل مع الناس

رغم إنى ممكن أتعامل معاهم كويس

تاسعاً : نفسى بجد أستقر فى حياتى فى كل شئ

نفسى أكون قادره إنى أحدد أهدافى فى الحياه

المرحله اللى بعيشها دلوقت أكتر مرحله مش حاسه فيها بالإستقرار

حاسه إنى تايهه فى الدنيا الوسعه دى

عاشراً : أحلى لحظه عندى لما يجى عليا الليل وأجى أحط رأسى على المخده

وأحس بجد إنى أستاهل النوم

يعنى أحس إنى عملت فى يومى كل اللى مطلوب منى

خلاص كده أنا قلت بما فيه الكفايه عن نفسى

أنا هبعت التاج دا لمين؟؟؟؟؟؟؟؟؟

صاحب المضيفه

البصيره

موناليزا

فزلوكه

تايه ومش تايه

إخلاص وخيانه وإنت وضميرك

الإخلاص لما يتقابل بخيانه شئ غلط

والخيانه لما تتقابل بإخلاص برضه شئ مؤلم

نفسر أكتر

الإخلاص لما يتقابل بخيانه شئ غلط

واحد بيحب واحده ومخلص لها جداً

وبالرغم من كده بتتفنن فى الخيانه

وبدون أسباب بتخونه

وهى عارفه ومتأكده إنه بيحبها ومخلص لها

وبالرغم من كده بتسمح لنفسها

إنها تخون

ودماغك متروحش بعيد عن صور الخيانه

الخيانه ممكن تكون بنظره

أو بكلمه صغيره

أو بإبتسامه حتى

لكنها خيانه

.........

الخيانه لما تتقابل بإخلاص شئ مؤلم

يعنى لما تخلص قوى لشخص مايستاهل منك إخلاص

لما تبقى عارف إن الشخص دا بيخونك وبيفتخر بالخيانه

وبرضه مش بيلاقى منك غير إخلاص على طول الخط

ويمكن الاخلاص بتاعك يكون من ضمن

الحاجات اللى بتشجعه على الخيانه

أعرف واحده برضه من كتر ما زهقت من إخلاصها

مع حبيب خاين

قررت تجرب وتخون

بس للإسف معرفتش

لأن الخيانه طبع

الخيانه لاتقابل بخيانه

شفت حبيبك بيخونك

يبقى الإنفصال عنه هو الحل مش الخيانه

والاخلاص حرام بتقابل بخيانه

انت وضميرك بقى

....

حــــــلــــمـــى

حلم جميل

على وشك أن أستيقظ منه قريباً

فهكذا أنا دائماً

وهذه المره وهذا الحلم

تمنيـــــــــته كثيرا

ولازالت أتمناه

كنت أعتقد أنى قد إقتربت منه

ولكنى وجدت نفسى أبعد ما يكون عنه

إنتهى الحلم

وإنتهيت معه

......

عرفت هدفك ولا لسه؟

لو إنت مش محدد هدفك فى دنيتنا دى
وعارف إنت فين بالظبط
ورايح فين كمان
يبقى ياعينى عليك
هتوه فى الدنيا
وعلى فكره محدش هيدور عليك
لأن كل واحد دلوقت
بيدور على نفسه
ومفيش حد يهمه إن كنت تايه
ولا ماشى وإنت عارف سكتك
لأنه ببساطه محدش فاضى ليك
..........

الحيــــــــــــــــــــــــــاه

من خلال خبرتى فى الحياه

باقى لى كام سنه عايشه فى الدنيا دى

إكتشفت حاجه مهمه خالص

إكتشفت إيه ياترى؟؟؟؟؟؟؟

إكتشفت سر السعاده

سر السعاده يكمن

وخلى بالك من يكمن دى

أصل أنا واحده مثقفه

سر السعاده يكمن فى إسعاد الأخرين

جرب تكون إنت مصدر سعاده الأخرين

شوف إيه اللى ممكن يريحهم

وإعمله ليهم

حد بيرتاح فى مكان معين

ساعده إنه يوصل للمكان ده
حد بيرتاح أما بيكون مع ناس معينه

خليه يشوفهم ويرتاح معاهم

حد بيرتاح طول ما إنت بعيد عنه

بسيطه متوريهوش وشك تانى

كده يعنى

شوف إيه اللى ممكن يسعد الناس

وحاول تساعدهم فى الوصول للى يسعدهم

وإما تعمل كده

هتكون سعيد وراضى عن نفسك

وهتحس إنك ليك لازمه فى الحياه

وإن ربنا بعتك لمهمه كبيره

دا بالنسبه لسر السعاده

نيجى بقى لسر التعاسه فى الدنيا

ودا بالنسبه لى

هو إنك تكون سبب فى مشاكل كتيره

بين الناس

وتكون سبب أذى للى يعرفوك

وكمان اللى مش يعرفوك

إحساس وحش وتعيس

إنك تكون كده قاعد لوحدك

ومش بتعمل حاجه

وعارف ومتأكد إن إنت سبب فى100 مشكله

وإن الكل مش طايقك

عموماً لو صحاب المشاكل دى

قدروا يسمحوك ويعدوا لك

على أساس إنكم كنتم صحاب

أو حبايب أو حتى أهل

إنت بقى مش ممكن هتسامح نفسك أبداً

وهتعرف ساعتها سر التعاسه

وكدا أنا خلصت ضميرى

وقلت خلاصه تجاربى فى الحياه

لماذا؟؟؟؟

من الطبيعى أن نشعر بالسعاده
حينما نقترب من تحقيق أحلامنا
وليس من الطبيعى
أن نفقد مشاعر السعاده حينما نحقق أحلامنا
ترى لماذا نفتقد شعورنا بالفرحه عند تحقيق أحلامنا البعيده
هل لأننا نخشى أن تكون تلك الأحلام مجرد سراب؟
نتعلق به أيام ثم لايلبث أن يختفى حينما نقترب منه أكثر
أم لأننا لم نجرؤ يوماً أن ندرج تلك الأحلام
ضمن قوائم أحلامنا التى من الممكن أن تحدث؟
أم لأننا إنتظرناها طويلاً
حتى فقدنا الأمل فى حدوثها على أرض الواقع؟
ترى هل هناك أسباب اخرى
تجعلنا نقف صامتين
فى وقت توقعنا فيه أنا نشعر بالسعاده الغامره؟
؟؟؟؟؟

مغــــــــــــــــــــــــــــرور

الغرور طبعاً زى ما إحنا عارفين
المفروض إنه صفه وحشه
لكن تعمل إيه لو الظروف أجبرتك على التعامل مع الشخص المغرور ده
ياترى هتعرف تتعامل معاه؟
أنا شخصياً أعتقد إن التجاهل مطلوب جداً فى الحاله دى
لإن التجاهل لشخصيه مغروره بيضايق
فأنا هنا هقولكم على بعض التصرفات اللى ممكن تعملها
لو حصل وإتعاملت مع الشخصيه دى
ولازم لو عملت بنصحيتى تطبقها بحرفنه
وإلا هتنكشف ويبان إنك إنت اللى مضايق
والتصرفات اللى هقولها على سبيل المثال لا على سبيل الحصر
أولاً: لو قبلت الشخص ده متروحش زى الأهبل تسلم عليه الأول
إستنى شويه لما هو اللى يجيلك
إعمل نفسك مش واخد بالك منه
ولو حصل ونده عليك متردش من أول مره
بسيطه إعمل نفسك مسمعتش
ثانياً: أول ما تقابله سلم عليه بشويه فتور وبرود
يعنى بلاش أحضان والذى منه
هو مش ناقص إنك تحسسه إن رؤيته تفرق معاك
ثالثاً: أوعى تنطق بإسمه طول فتره الحوار
وياسلام لو حسسته إنك مش عارف إسمه
أو ناسيه ، تقولى إزاى ؟
فيه كذا طريقه لكده
منها إنك تندهوا بإسم أخوه، أو إسم واحد صاحبه قوى
أو زياده فى الغلاسه أختار له إسم دلع مش مناسب خالص مع إسمه
يعنى لو هو إسمه مثلاً أحمد
قولوه إزيك ياكوكو أو أزيك ياسمسم
وكل ما تختار إسم مستففز كل ما يكون أفضل
كل واحد يتفنن بقى ويختار الإسم اللى يغيظ اكتر
رابعاً: أول ما يبدأ صاحبنا فى الكلام قاطعه بسرعه وبأى طريقه
إنت وشطارتك
مثلاً بص الناحيه التانيه وإسال عن أى حاجه تافهه
كأنها لفتت إنتباهك، ودى لها معنى كبير قوى
معناها إن الحاجه دى على قد تفاهتها
إلا أنها قدرت تلفت الأنتباه عن كلامه الأكثر تفاهه
وممكن كمان أثناء حواره
وفلحسته عليك (منظرته)يعنى
قوله معليش مخدتش بالى كنت بتتكلم فى إيه؟
الكلمه دى هتحسسه إنه كان بينده فى مالطه
خامسا: ً مش لازم ترد بسرعه على أى إستفسار أو سؤال منه ليك
التقل برضه صنعه
سادساً: ظبط إنفعالاتك على قد ما تقدر
لو قالك حاجه المفروض يكون رد فعلها
مش ممكن ، دى حاجه هايله،.......إلخ
خلى إنفعالات وشك ترد بالعكس
على طريقه إيه الهبل اللى بتقوله ده
سابعاً:إشغل نفسك بأى حاجه طول ما هو بيكلمك
ومتبصش ناحيته
إلعب بالموبيل بالمفاتيح بأى حاجه
وإطلع له مره واحده بسؤال بره الموضوع
ثامناً: بلاش تنبهر بأى حاجه مع الشخص المغرور
تجاهل أى حاجه معاه
لكن لو حاجه إنت شايف إنها لازم تلفت الأنتباه
فعلق عليها تعليق بسيط جداً
ومتخليش الحاجه دى محور الكلام معاه
تاسعاً: إياك تسيب له الفرصه إنه يستأذن الأول
خليه فى وسط كلامه وإندماجه فى المنظره
رخم إنت عليه وبص فى ساعتك وقوله
وإنت باصص فى الساعه
معليش مش فاضى دلوقت
ممكن نبقى نكمل كلام مره تانيه
ســـــــــــــــــــــــــــــــــــــــــلام

ياسمسم
دى شويه حاجات بسيطه من عندى
.اللى عنده إضافه ياريت ميبخلش علينا ياجماعه

...........المستحيل...........

المستحيل كلمه من أفواه المجانين

لدى إيمان عميق بتلك المقوله

فلا يوجد شئ يسمى المستحيل

فكل شئ وأى شئ

من الممكن أن يحدث

وبمنتهى السهوله

فأحياناً كثيره نظن أن أمراً ما من المستحيل أن يحدث

ثم نفاجأ بحدوثه

كلمه مستحيل

هى كلمه شائعه فى القاموس اللغوى

لدى أشخاص عاجزين

تراهم يستخدمونها كثيراً فى حواراتهم

فى حين أن علماء النفس يقولوا أنا لا أستطيع إذن أنا لا أريد

فالإراده تسبق الإستطاعه

وعدم مقدرتك على تحقيق أمر ما

يعنى عدم وجود إراده حقيقيه لفعل هذا الشئ

لو توافر لديك قدر عالى من الإراده

فإنه بإمكانك تحقيق أى شئ

أى إنه لا يوجد ما يسمى بالمستحيل

فلا يجب أن نقول

من المستحيل أن يحدث هذا

أو أن هذا الأمر غير ممكن

ولكن يجب أن نتحلى بقدر من الصراحه مع أنفسنا

ونقول إننا لا نريد أن نفعل ذلك