سمعت خبر حلو
فرد فعلك الطبيعى هيكون فرحه
هتبان على وشك
طب سمعت خبر وحش
نفس النظام هزعل وهضايق
وأكيد هيبان علي وشى إنى حزين
طيب حد قالك حاجه نرفزتك
أكيد هتنرفز عليه
كل اللى فات دا كان ينفع زماااااان
دلوقت بقى فيه حاجات تانيه خالص
خليكوا معايا يمكن تستفادوا حاجه للزمن
لو حد فى يوم صدمك بخبر منيل بستين نيله
وحسيت كأن شاكوش ضربك على دماغك
إعمل نفسك عادى
عادى جداً ولا يهمك إثبت بس قدامه
وإعمل نفسك متضايقتش
وكمل حوارك ومتخليش حد يلاحظ صدمتك
لو فى يوم حسيت نفسك حزينه قوى
وعندك مشاكل الدنيا والأخره
فوق دماغ حضرتك
وفجأه لقيت نفسك وسط ناس فرحانه قوى
ومبسوطه قوى
مطلوب من حضرتك إيه؟
مطلوب منك تضحك وتشارك بالفرحه كمان
وميبانش عليك الغم
طيب لو حد وحشك قووووووووى
ونفسك تتصل بيه وتقوله
وحشتنى ياللى مش بتحس ولا بتفهم
ونفسى أشوفك
ياترى ممكن تعمل إيه؟
طنشه ومتسألش عليه
وإشغل نفسك بأى حاجه
يمكن تنسى أنه بجد وحشك
ولو حصل وسأل عليك هو
وربنا كرمه وجات منه هو
إحمد ربنا الأول
وبعدين كلمه عادى جداً ببرود يعنى
ولا كأنك كنت هتموت على إتصاله
ولا كنت متوقع منه مكالمه من أساسه
لو قلقان ومنتظر حاجه معينه
خلى وشك يعبرعن أى حاجه تانيه غير القلق
خليه مثلا يعبر عن إرتياح
أهو أحسن ما يبان عليك القلق
وتصعب على اللى حوليك
ودا يرميك بنظره شفقه
ودا يقولك كلمه تقلقك أكتر وهو مفكر إنه بيطمنك
طب لو مبسوط بقى والظروف رماتك
فى وسط ناس مهمومه
وفشلت إنك تغير مزاجهم للأحسن
يبأه مش قدامك غير إنك تمشى وتسيبهم
أو إنك تعيش معاهم اللحظه
وتتغم على عينك زيهم
وتخلى فرحتك بينك وبين نفسك
وتكتمها جواك
ويمكن على نهايه القعده تكون نسيت إنك كنت مبسوط
وقيس على كده حاجات كتير فى حياتنا
وطبعاً الموضوع مش سهل
الحكايه دى محتاجه تدريب كتير
دا مش نفاق ياأصحابى
دا حفاظ على مشاعرنا اللى بهدلناها معانا
بهدلناها من كتر ما بالغنا فى إظهارها بصدق
مشاعرنا وإنفعالاتنا البسيطه حاجه خاصه قوى
متبنش قدام أى حد بسهوله
وبينك وبين نفسك خد بالك من حواراتك
خادع نفسك يعنى
لو نفسك قالت لك حاجه مش عجباك سيبك من كلامها
لو قالتلك : أنا متضايقه وزهقانه
قلها : لا دا مبسوطه قوى ياروحى
ولو قالتلك : دا خبر زى الزفت
قلها : وعسى أن تكرهوا شيئاً وهو خير لكم
ولو قالت : دا إحنا خدنا مقلب كبير
قلها : دا إحنا كنا بنتعلم
ولو قالت : الدنيا وحشه والناس أوحش
قلها : إنتى اللى فهمتى الدنيا والناس غلط
ولو ردت عليك وقالت : زهقت منك
قلها : قلها وأنا بحبك ومتمسك بيكى ياروووووووحى
26 comments:
بوست مميز
وكلامك جميل
وفى حاجات عايزة تدريبات من الانسان
عشان يقدر يتعامل وياها
ربنا يوفقك
تحياتى
لكن كده الدنيا تقف
تخيلي ان كلنا عملنا كده مع بعض
هايكون الوضع
الدنيا ساعتها هاتكون عاملة زي رواية أوقات عصبة اللي كنا بناخدها في الثانوية زمان
مافيش مشاعر
مافيش أحاسيس
ما فيش أي حاجه خالص
لكن المطلوب الوسطية في كل حاجه
والنبي صلى الله عليه وسلم كان وسط في كل شيء
كده الميزان يتعدل ويكون زي الفل
ده رأيي العادي يعني
تحياتي
ساعات كتيرة اوي
مستحيل نلاقي الوش الخشب اللي انتي بتحاولي تساعدينا بيه
شخصيا معرفش
بهري في نفسي مع اللي حواليا
وبشيل زيهم
ولو حتى معرفهمش
وممكن ازعل من غير ما اعرف هوا فيه
يعني
غية مش اكتر
بس ممكن احاول مع المودام بتاعتي لما تقولي زهقت منها اقولها كدا ويارب متبقاش تضربني بالساطور عشان برودي
:)
لك تحياتي
السلام عليكم
بس انا عندى وجهة نظر
انا كده مش هبقى متصالح مع نفسى
وده ممكن يعمل ضغط زيادة عليا ويودينى فى لحظة معينة لأكتئاب شديد نتيجة الضغط المتواصل فى كبت المشاعر
هو ده نوع من انواع الاعتراض ولا نوع من انواع الرضا الكامل؟
على العموم هو بجد بوست حلو اوي بس ليه الكثير من التحفظات على الفكره في حد ذاتها
شكرا على النصائح الجميله دى
اما بخصوص الموضوع لو على بلوجر انا موافقه
اصل انا مش مشتركه على الفيس بوك
ومش بعرف اتعامل معاه
تحياتى ولاء
مش غارف الرد ايه
بجد موضوع حلو موت
بداية نقدم إعتذراتنا
أنا آسفة خالص على التأخر فى أخذ التاج
بس أنا فعلا كنت مشغولة جدا الفترة إللى فاتت
شكرا جدا خالص عليه
مدركة إنه تدبيسة لإنه صعب شوية
لكن ولا يهمك
إستئذان بسيط
هخليه بعد الإمتحانات لإنو محتاج دماغ
وهى مش موجودة حاليا خالص
دمت بخير
طنش تعيش تاكل قراقيش
انا جاى اسلم
واسال على الصحة
والموضوع الجديد
فى الانتظار
تحياتى
ههههههههه
حرااااااااااااام بجد
يعنى احنا المفروض نفضل طول الوقت معيشيين نفسنا فى دور مش دورنا...حرام عليكى بجد
ههههههههههه
حقولك على حاجة..المفروض ان المشاعر اتخلقت علشان تبان و تتوظف صح مش عشان افضل طول عمرى اكتمها و احربها و الغيها انما زى ما قلتى ساعات كتيرة جداااااا مشاعرنا بتتبهدل لمجرد ان ناس مش قادرة تفهمها او تحسها او على الاقل تحترمها و خلاص...مش عارفة ساعتها يكون الحل ايه؟
كله كوم و لما حد يوحشك و تقوم تكلمه عادى دى كوم تانى
هههههههههه
معرفش ازاى
ايدى على كتفك بقى..كورسات و دورات تدريبية مكثفة لكبت المشاعر
بجد بوست تحفة
تحياتى
والله بجد انا استفدت من النصائح الغالية دى واكتر حاجة ريحتنى
بجد
طيب لو حد وحشك قووووووووى
ونفسك تتصل بيه وتقوله
وحشتنى ياللى مش بتحس ولا بتفهم
ونفسى أشوفك
ياترى ممكن تعمل إيه؟
طنشه ومتسألش عليه
وإشغل نفسك بأى حاجه
يمكن تنسى أنه بجد وحشك
ربنا يجازيكى خير
طيب وليه نكدب علي نفسنا
ليه ماتكونيش أنتي
أنتي وبس
بكل مميزاتك وانفعالاتك
بكل عيوبك وحزنك
ليه نكون حد غيرنا
ونخسر نفسنا
وفي الاخر
هانندم علشان فرطنا في حاجه جميله جدا
فرطنا فينا
تحياتي
تامر نبيل
شكراً على رأيك
وإبدأ تدريب بأه
ربنا معاك
صاحب المضيفه
كلامك مظبوط
بس ساعات الواحد بيتحط فى مواقف
تحتم عليه إنه ميكونش على طبيعته
وأنا لما كتبت البوست ده
كنت فى إتعرضت لحاجه زى كده
يعنى كنت فى منتهى الحزن
ومحتاجه إنى أكون لوحدى
ولقيت نفسى فى حفله عيد ميلاد غصب عنى
لازم أضحك وأهيص
ومحدش يحس بحزنى
تفتكر كان ينفع ساعتها
أكون على طبيعتى
وأعبر عن مشاعرى
مفتكرش كان ينفع
سلاااااااااام
حائر فى دنيا الله
كتير بنزعل من غير سبب
وكأن الزعل بقى هويه
بنزعل على ناس نعرفها
وناس منعرفهاش
المهم
قولى حتشترى الشاطور منين
علشان شكلى ححتاج واحد قريب
سلاااااااام
إستراحه محمد
رأيك دا فكرنى برأى حد أعرفه
ديماً ينصحنى بعدم كبت المشاعر
إنتوا تعرفوا بعض ولا إيه؟
ولاء
معرفش والله إن كان دا إعتراض ولا رضا
وأنا واثقه إن كتير حيكون لهم
رأى غير رأيى
بس أنا حسيت كل كلمه كتبتها بجد
وبخصوص الفكره بتاعتنا
فإنتظرينا قريب قوووووى على البلوجر
وأكيد إنتى معانا
سلاااااام
صوت من مصر
ربنا يجبرك زى ما جبرتنى
الكل معترض على كلامى
أخيراً حد عجبه البوست
ميييييرسى
فزلوكه
إعتذارات مقبولات من بنات أمورات
محبوبات فى المدونات
ربنا معاكى
ويوفقك يارب فى الأمتحانات
إنتى وكل اللى تعرفيهم
واللى متعرفهومش بالمره
وبراحتك ياقمر لما تخلص
إحنا منتظرينك
كفراوى
طنش تعيش تاكل قراقيش
!!!!!!!!!!!
هى فين القراقيش دى
أصل أنا نفسى فيها
بصى دينا
فيه واحده أعرفها ركبت معايا المواصلات
وقالتلى خبر معين
رد فعلى الطبيعى إنى أندهش وأسأل
وطبعاً لو أنا عملت كده
كنت حأكد لها إن الموضوع
اللى بتتكلم عنه يهمنى
وبكده تبقى كشفت سر من أسرارى
يارب تكونى فاهمنى
فكان لازم أبان عادى جداً
ولا كأنى خدت بالى من حواراها
وطبعاً بكده ضمنت إنى أحافظ على أسرارى
من خلال محافظتى على إنفعالاتى
فهمتى ياقمرى
مدحت محمد
الحب والأهتمام
حاجه مش بنشحتها
جات أهلا وسهلا
مجتش يبقى كرامتى عندى أغلى من أى شئ
وأكيد ربنا كاتب لنا الخير فى حته تانيه
مش صح برضه؟
الشارد
كلامك جميل
بس ساعات الواحد بيضطر لكده
بيضطر يضحك وهو حزين
وساعات تانيه يبقى غصب عنه لازم يدارى فرحته
وأحياناً
بيضطر يبان جامد ولا همه
وهو أصلاً ضعيف
بيبقى نفسنا نقول للناس
اللى بنحبها
إننا بنحبها
بس للأسف مبنقولش
لإننا مضطرين منقولش
أكيد كبت الواحد لمشاعره إحساس مش حلو
بس بينفع صدقنى
تعرفى أحسن حاجة بتحببنى فى المدونه دى
أسلوبك
ممتع قوى وبسيط وتحسي انك قاعدة تتكلمى معانا كده فى العادى يعنى بصراحة و على الراحة على الأخر
سلام بقى كفاية كده
تـــــــــــــــــ(حنه)ـــــــــر
ربنا يفتح نفسك كمان وكمان ياتمر
ويارب يكون كلامك دا بجد مش مجامله
ومتعرفيش كلامك دا أثر فيا قد إيه
وخاصه منك إنت ياتمر
لأنى بجد بحبك وبقدرك قووووووووى
سلااااام ياتمر
Post a Comment