7.3.08

مغــــــــــــــــــــــــــــرور


الغرور طبعاً زى ما إحنا عارفين
المفروض إنه صفه وحشه
لكن تعمل إيه لو الظروف أجبرتك على التعامل مع الشخص المغرور ده
ياترى هتعرف تتعامل معاه؟
أنا شخصياً أعتقد إن التجاهل مطلوب جداً فى الحاله دى
لإن التجاهل لشخصيه مغروره بيضايق
فأنا هنا هقولكم على بعض التصرفات اللى ممكن تعملها
لو حصل وإتعاملت مع الشخصيه دى
ولازم لو عملت بنصحيتى تطبقها بحرفنه
وإلا هتنكشف ويبان إنك إنت اللى مضايق
والتصرفات اللى هقولها على سبيل المثال لا على سبيل الحصر
أولاً: لو قبلت الشخص ده متروحش زى الأهبل تسلم عليه الأول
إستنى شويه لما هو اللى يجيلك
إعمل نفسك مش واخد بالك منه
ولو حصل ونده عليك متردش من أول مره
بسيطه إعمل نفسك مسمعتش
ثانياً: أول ما تقابله سلم عليه بشويه فتور وبرود
يعنى بلاش أحضان والذى منه
هو مش ناقص إنك تحسسه إن رؤيته تفرق معاك
ثالثاً: أوعى تنطق بإسمه طول فتره الحوار
وياسلام لو حسسته إنك مش عارف إسمه
أو ناسيه ، تقولى إزاى ؟
فيه كذا طريقه لكده
منها إنك تندهوا بإسم أخوه، أو إسم واحد صاحبه قوى
أو زياده فى الغلاسه أختار له إسم دلع مش مناسب خالص مع إسمه
يعنى لو هو إسمه مثلاً أحمد
قولوه إزيك ياكوكو أو أزيك ياسمسم
وكل ما تختار إسم مستففز كل ما يكون أفضل
كل واحد يتفنن بقى ويختار الإسم اللى يغيظ اكتر
رابعاً: أول ما يبدأ صاحبنا فى الكلام قاطعه بسرعه وبأى طريقه
إنت وشطارتك
مثلاً بص الناحيه التانيه وإسال عن أى حاجه تافهه
كأنها لفتت إنتباهك، ودى لها معنى كبير قوى
معناها إن الحاجه دى على قد تفاهتها
إلا أنها قدرت تلفت الأنتباه عن كلامه الأكثر تفاهه
وممكن كمان أثناء حواره
وفلحسته عليك (منظرته)يعنى
قوله معليش مخدتش بالى كنت بتتكلم فى إيه؟
الكلمه دى هتحسسه إنه كان بينده فى مالطه
خامسا: ً مش لازم ترد بسرعه على أى إستفسار أو سؤال منه ليك
التقل برضه صنعه
سادساً: ظبط إنفعالاتك على قد ما تقدر
لو قالك حاجه المفروض يكون رد فعلها
مش ممكن ، دى حاجه هايله،.......إلخ
خلى إنفعالات وشك ترد بالعكس
على طريقه إيه الهبل اللى بتقوله ده
سابعاً:إشغل نفسك بأى حاجه طول ما هو بيكلمك
ومتبصش ناحيته
إلعب بالموبيل بالمفاتيح بأى حاجه
وإطلع له مره واحده بسؤال بره الموضوع
ثامناً: بلاش تنبهر بأى حاجه مع الشخص المغرور
تجاهل أى حاجه معاه
لكن لو حاجه إنت شايف إنها لازم تلفت الأنتباه
فعلق عليها تعليق بسيط جداً
ومتخليش الحاجه دى محور الكلام معاه
تاسعاً: إياك تسيب له الفرصه إنه يستأذن الأول
خليه فى وسط كلامه وإندماجه فى المنظره
رخم إنت عليه وبص فى ساعتك وقوله
وإنت باصص فى الساعه
معليش مش فاضى دلوقت
ممكن نبقى نكمل كلام مره تانيه
ســـــــــــــــــــــــــــــــــــــــــلام
ياسمسم
دى شويه حاجات بسيطه من عندى
.اللى عنده إضافه ياريت ميبخلش علينا ياجماعه

21 comments:

سارة درويش said...

ازيك يا منمن وحشاااااااانى يا بنوتة ، بالنسبة لموضوعك فاكتشفت انى الحمد لله بعمل بالنصايح دى من قبل ما اقراها ، دايما ً لما الاقى حد او حاجة الناس مهبوولة عليها ما بحبش اديها اهتمام لدرجة بتستفز الناس اوى وبتخليهم هم اللى عايزين يعرفوا مين دى يعنى ، واحيانا بيوصفونى بالغرور بس والله كل الحكاية انى بحب اوزن المعادلة شوية واعرف بعض الناس انهم ماوصلوش للسما يعنى باللى هما فيه .. تقبلى مرورى يا قمر

ابو صهيب ( الجمعاوي الاصيل)سابقاً said...

السلام عليكم ورحمة الله وبركاته

طيب وليه ده كله

لو انت بتتعامل مع شخص مغرور

قرفه في عشته اه زي ما تفضلت وقلت

لكن من الافضل ان اسيبله المكان وامشي علشان مررتي متنفقعش

كلمتى said...

ازيك يامنايا
ههههههههههههههه
حلوه النصايح دى
بس تعملى ايه لو اتفرض عليكى انك تعاملى الشخص ده كل يوم
ساعتها لو عملتى بالنصايح دى مش بعيد قوى انت اللى تتحولى بقدرة قادر لمغروره
ماهو من عاشر القوم
ساعتها بقى هتعمل ايه ياجميل ؟!!
سلااااااااااااااااام

مدحت محمد said...

فى مثل بيقول
التكبر على المتكبر تواضع وفضيلة
شوفى انتى
قلتى المفيد والصح
وده افضل علاج للمغرور فعلا
تحياتى

العراف said...

ازيك يا منمن اخبارك شكرا على النصايح دى تعبناكى معانا بس انا راى انى بحب اتعامل مع الشخصيه المغروره لانى بعرفه نفسه كويس والحمد الله ربنا مدينى وده فضل من عنده حب الناس وعندى طريقه فى الاقناع رب وحده اللى يعلم بيها وشكرا يا منمن على موضوعاتك الجميله اشوف وشك بخير

صاحب المضيفة said...

كل ده يا هند

دا انتي شكلك خبرة في التعامل مع النوعيات دي بقى

على العموم

أنا باسمع مقولة من زمن مش عارف هي حديث ولا ايه

ان الكبر على أهل الكبر صدقة

يمكن


الله أعلم


دمت بخير

صوت من مصر said...

شكلك مغروره بس بامانه بوست جميل جدا

أم أحمد said...

تصدقي أنا باعمل كدة وحتي هاتلاقي ليا نوع من صحابي بيقووول عليا مغرورة مايعرفوش ان ده رد فعل طبيعي لغرورهم هما
تحياتي علي نصايحك الغالية

Desert cat said...

ههههههههههههههههه
ايه الجمال ده يا منمن
بس فى حاجات يا قلبى مش من اداب الحديث
هو انا متفقة معاكى انى مش اسلم بلهفة واحسسه انه انسان عادى زيه زى باقى البشر
انما مش ينفع اقاطعه اثناء الكلام ومش ينفع لما ينادى عليا مش اعبره
ده حتى لو متخاصمين وجه يكلمنى المفروض استجيب ليه
باقى النصايح فى الجووووون
تحياتى يا جميلة
امواااااااااااااه

انين الحزن said...

ازيك ياقمر ااخبارك ايه
انا جيت اهو وهنتواصل بقه

بس ايه الكلام الجامد دا انتي اكيد مخنوقه من حد مغرور واكيد عملتي فيه كل النصايح دي

بس حلوه بجد

انا حاسه اني لو عملتها مع حد ممكن ينتحر مش يبطل غرور

سلامووووووووووووووز
وزة

mnoon said...

s@rora
إنتى وحشانى أكتر
وبجد نفسى أتعرف عليكى وجهاً لوجه
وأنا مصداقه إنك بتتعاملى كده
مع المغرورين
مش إعلاميه بقى؟
سلاااام

mnoon said...

الجمعاوى الأصيل
وعليكم السلام ورحمه الله وبركاته
طيب تعمل إيه لو مضطر
إنك تتعامل مع الشخص ده؟
أعتقد إنك مينفعش تسيبله المكان
من غير ما تفقعله إنت مررته
مش بيقولوا
خير وسيله للدفاع الهجوم
شكراً على تعليقك
سلاااااااام

mnoon said...

كلمتى
لو بتعامل مع الشخص ده كل يوم
صدقينى
أنا قادره إنى أخليه يبطل غرور لأبد
وأنا قد كلامى يادودو
وإنتى عارفه
سلام يالمضه

mnoon said...

مدحت محمد
هى دى المقوله اللى على أساسها
كتبت كل الكلام ده
لكنى مش عارفه مصدرها
متعرفش مين قالها؟
تبقى إعرف وقولى

mnoon said...

العراف
على فكره أنا كمان بستمتع
بالتعامل مع الشخصيه المغروره جداً
بس للأسف بجد مش بقابلها كتير فى حياتى
كل اللى أعرفهم فى حياتى
ناس زى العسل
ناس طبيعين
سلام ياعراف

mnoon said...

صاحب المضيفه
صدقنى أنا مش بتعامل مع نوعيات زى دى
خااااااااااالص
على الأقل دلوقت
لكن زمان كنت فعلاً خبره
تحياتى إليك

mnoon said...

صوت من مصر
هههههههههه
أنا مغرور
ياريت
أحنا نطول
المهم إن النصايح عجبتك
سلام

mnoon said...

أم أحمد
وحشتينى والله
الغرور
رد فعل طبيعى للتعامل
مع شخص مغرور
المهم إن إحنا نتعامل طبيعى
مع الناس اللى مش مغرورين
وبتمنى إن كلامى يكون عجبك بجد
سلام لأحمد وأم أحمد

mnoon said...

desert cat
يابنتى إفهمى
أنا أقصد إتقلى شويه
يعنى إعملى نفسك مسمعتيش
الصوت ملفتش إنتباهك
من أول مره
لكن بعد كده ردى عليه براحتك
وبالنسبه للمتخاصمين
أنا لو حد مخاصمنى
ونده عليا
أول ما ببصله
بضحكله وبجد من قلبى
تقدرى تقولى هبل
يعنى الكلام هنا
مخصوص للتعامل مع المغرورين بس
وهما مش هيعتبره دا قله ذوق ولا حاجه
صدقينى
سلاااام ياقطه

mnoon said...

أنين الحزن
ينتحر مره واحده
دى شويه نصايح بسيطه
علشان تبعد المغرور عنك
بس مش أكتر
أنا سعيده بوجودك هنا خالص
سلامى إليكى

Anonymous said...

هذا هو مثل رائع الموارد المفيدة التي كنت توفير وتعطيه مجانا غائبة مقابل. أحب رؤية المواقع التي فهم قيمة توفير الموارد نوعية مفيدة مجانا. ذلك؟ ق القديم ما يدور حولها ويأتي البرنامج.