22.6.08

شط إسكندريه






فضلت أحاول أكتب موضوع متفائل

يعبر عن حالتى النفسيه المتفائله

لكنى بصراحه عجزت

المهم قلت لازم أنزل بموضوع متفائل

وبمناسبه الصيف والحر والأجازه

فكان لازم أفتكر إسكندريه

وحكاياتى معها اللى لا يمكن أنساها

إفتكرت لما إتفقنا أنا وصحابى

نروح إسكندريه

وإفتكرت
لما إتفقنا نلعب كوره على الشاطئ

وبما إنى مش بفهم فى الكوره

فقد قمت بإستبعاد نفسى أوتوماتيكياً

من المشاركه فى اللعب منعاً للإحراج

وبدال ما أكحهلها عميتها

وقال إيه قمت بدور الحكم والمعلق فى نفس الوقت

وكنت مفكره بصراحه الموضوع سهل

ولا يتعدى إن أقعد على الكرسى

وأمسك الميكرفون

أقصد حاجه تشبه الميكرفون

وأقول الكوره مع سلوى

ومنها لبسمه

وجوووووووووووون

كنت مفكره الموضوع كده وبس

لحد ما الفريقين وقعوا مع بعض

فريق شايف إنه جاب جون

والفريق المنافس المفترى شايف إنها جات فى العرضه

وطبعاً ظهر دورى كحكم

وبجد حسيت عندها بنفسى وبدورى المهم اللى إخترته فى اللعبه

بدون قصد

أجى بقى لحل المشكله

الكوره جات جون

ولا فى العرضه

عـــــــــــــرضــــــــــه!!!

هى فين صحيح العرضه دى

اللى بيقولوا الكوره جات فيها

أصلاً الجون محددينه بكومين رمل مش أكتر

يعنى وجود العرضه شئ وهمى

وطبعاً لإننا مش ملتزمين بوقت

فالموضوع طول

وقلتلهم سيبونى أفكر

وفتره التفكير عندى كانت بصراحه

مليانه بالإغراءات

فريق يبعتلى مندوب ويقولى هنسقيكى حاجه ساقعه على حسابنا

وفريق يقولى طلباتك أوامر

وطبعاً لأنى صاحبه مبادئ

لايمكن أغير مبادئ

وفى وسط خناقه الفريقين ودوشتهم

قررت

قررت إيه؟؟؟؟؟؟

إن الكوره جات فى العرضه

أه جات فى العرضه

وكملت التعليق على الماتش

وأنا بمزمز ميراندا

وأكيد إنتوا فهمتوا جات منين

وعقبال المصيف الجاى

28 comments:

صالح سعيد said...

نادرا لما بكون صاحب اول تعليق
لكنه حصل الان
ازيك يا منون
عامله ايه
يا رب تكونى بخير
اين انتى من مدونتى المتواضعه
على العموم انا حبيت انى اطمئن على مدونتك الجميله
دمتى بكل خير

صاحب المضيفة said...

حكاية جميلة ورقيقة


دمت بخير

رأفــــت خضـــر said...

اول مرة اسمع نع حكم بيبيع الماتش بحاجة صقعة بس انا عارف انتى بعتى الماتش لية مش عشان تمزمزى ميرندا
تؤ تؤ تؤ عشان خفتى من سلوى لان اكيد فريقها الى جة فية الجون وكان ممكن تتقتلى فى اسكندرية لو قولتى الكورة جونوطبعأ انتى قولتى اتقى شر سلوى واشرب ميرندا وربنا يسامحنى يعنى هما بيلعبو فى كأس العالم

أ / أحمد عبد المنعم said...

بسم الله الرحمن الرحيم
ادعوك لزيارة مدونتى
http://ommee.blogspot.com

فزلوكة said...

أهو أنا لسه راجعة من إسكندرية

من الأماكن إللى ذكرياتها مبتتنسيش أبداااااااااااااااااا

تراكات القلعة والمية والبحر والشط والهوا وكلوووووووووو

الكورة جت جوووون على فكرة وإنتى مش واخدة بالك

وحشتينى على فكرة

mnoon said...

صالح سعيد
سوووووورى يا صالح
أنا فعلاً مقصره فى التدوين
وفى التعليقات
فتره وهتعدى إن شاء الله

mnoon said...

صاحب المضيفه
شكراً كتير على ذوقك
دمت انت بكل خير

mnoon said...

اروح لمين
منور يا باشمهدس
أنا لايمكن أخاف من حد
لا تقولى سلوى ولا فاتن
أنا بس كانت عينى فى الحاجه الساقعه
مش اكتر

Arsenal Way said...

أنا مره بعت ماتش بساندوتش كبده
(:
زيارتك تشرفنا ورأيك يهمنا
www.eng-mostafa.blogsot.com

صوت من مصر said...

طب عدى وسلمى على البلوج بتاعى ولو بنظره بجد مفتقد كلامك للاسف وعارف انك زعلانه لكن برد بتعليق فى بوست كله تفائل ؟

abo salah said...

بعد السلام عليكم

اولا ياستى ربنا يديم عليكي حالة التفاؤل دايما

وثانيا
طبعا بعد الميراندا دي أنتى حبيتي منصب الحاكم والمعلق
لأنه منصب بيروى عطشك
هههههههههههههههههه


تحياتي ليكي

تــــ(حـنة)ــــر said...

والله انتى عسل على الأخر
وبعدين كل ماجى عندك الاقى كده
ربنا يسعدك دايما
انا بقى جيت اطمن وياريت مكنش متأخرة زى كل مرة

dina said...

ههههههههههههه
و الله شكلها كانت ايام حلوة ... ما هى كل ايام اسكندرية زى العسل
بس بجد حكماية جبارة انتى...مزمز ميرندا
هههههه
تحياتى

العراف said...

موضوعك جميل جدا لانى بموت فى اسكندريه وجمالها حلوه الحاله اللى انت كنتى فيها ويارب تدوم عليكى على طول

فزلوكة said...

يا منوووووووووون
أنا جاوبت على التاج

تعالى شوفيه

كلمتى said...

ازيك يامنوووووووون

هههههههههههههههههههههههههه

طب مش كنت تقولى للغلبانه صحبتك الل برضه ما كنتش فاهمه حاجه فى الكوره

لدرجة اننا كنت بدخل اجوان فى فريقى
لحد ما قرروا ان محدش هيلعبنى خالص

كنت قوليلى اقعد جنبك
بس تتعوض المره الجايه
قريب طبعاً

سلام لمنونتى

mnoon said...

مصطفى أبو زيد

قريت تعليقك اللى فات على موضوع عروسه من غير شبكه
ومبسوطه برأيك
وإن شاء الله هزور مدونتك أكيد


ياريتنى أفتكرت سندوتشات الكبده
اهى كانت احسن من ميراندا 100 مره

mnoon said...

أحمد
عـــــــــــلم وإن شاء الله أنفذ
سلاااااام

mnoon said...

فزلوكه
طيب راجعه من إسكندريه وخليها فى سرك
لكن تيجى تغيظينى هنا
يبقى كده هتزعلينى يا فزلوكه
اوكى بكره نروح ونيجى نغيظيك

mnoon said...

صوت من مصر
خلاص التفاؤل خلص
هنزلك ببوست كله غم وهم
علشان يعبر عن حالتى دلوقت
اروح أكتبه بقى
سلااااام

mnoon said...

أبو صلاح

فعلا المنصب بيروى العطش
وبيشبع
بس للأسف ماستفدتش منه غير بالميرانداوبس
كان لازم يكون ليا طلبات أكتر من كده

يالا تتعوض

mnoon said...

تمــــــ حنه ـــر

ومين فين مش متأخر
معتقدش فيه حد من المدونين مقصر زى
وعلشان كده بعذر الكل
ربنا يكرمك ياتمر

mnoon said...

دينا
فينك يابنتى من زماااااااان
وحشتينا والله
إدعينا نصيف السنه دى
بس إدعى بضمير
اوكى

mnoon said...

العراف
حاله التفاؤل راحت لحالها دلوقت
يارب ترجع
إنت فين من زمان
؟

mnoon said...

دودو
تتعوض ؟
دا إنت طموحك عالى يادودو
كل سنه وإنت طيبه

أ / أحمد عبد المنعم said...

بسم الله الرحمن الرحيم
حقيقى قصة جميله ممكن نستفيد منها عدة أشياء
أولا : لا يجب أن يدخل الإنسان منا نفسه فيما لا يعلم
ثانيا : ثانيا الحكم بين الناس شىء صعب يحتاج إلى خبرة وحكمة
ثالثا : ضمير الإنسان أكبر من مشروب بارد
رابعا : الألم النفسى الذى يعيشة الحاكم الظالم اشد من الألم الناشىء من كلمة لا أستطيع التحكيم
خامسا : نظرة المجتمع إلى الفرد الظالم تظل تطارده
سادسا : استبعاد هذا الشخص الذى يحكم لصالح من يمنحه المشروب البارد من التحكيم فى المستقبل يشكل ألما اجتماعيا ونفسيا عميقا
كنت أتوقع الاعتراف بعدم القدرة على التحكيم والتراجع عنه وأظنها كانت نهاية ترضينى فى شخصيتك الرقيقة الطريفة

mnoon said...

أحمد
والله وصلتلى إحساس عالى بالذنب
على حاجه حصلت من 3 أو 4 سنين
بس عذرى الوحيد إننا كنا واخدين الموضوع تهريج مش أكتر

موناليزا said...

مش لو كنتى ركزتى كويس مكنتيش خدتى رشوة
انا لو مكانك كنت اقوللهم عيدوها تانى