.jpg)
فضلت أحاول أكتب موضوع متفائل
يعبر عن حالتى النفسيه المتفائله
لكنى بصراحه عجزت
المهم قلت لازم أنزل بموضوع متفائل
وبمناسبه الصيف والحر والأجازه
فكان لازم أفتكر إسكندريه
وحكاياتى معها اللى لا يمكن أنساها
إفتكرت لما إتفقنا أنا وصحابى
نروح إسكندريه
وإفتكرت
لما إتفقنا نلعب كوره على الشاطئ
وبما إنى مش بفهم فى الكوره
فقد قمت بإستبعاد نفسى أوتوماتيكياً
من المشاركه فى اللعب منعاً للإحراج
وبدال ما أكحهلها عميتها
وقال إيه قمت بدور الحكم والمعلق فى نفس الوقت
وكنت مفكره بصراحه الموضوع سهل
ولا يتعدى إن أقعد على الكرسى
وأمسك الميكرفون
أقصد حاجه تشبه الميكرفون
وأقول الكوره مع سلوى
ومنها لبسمه
وجوووووووووووون
كنت مفكره الموضوع كده وبس
لحد ما الفريقين وقعوا مع بعض
فريق شايف إنه جاب جون
والفريق المنافس المفترى شايف إنها جات فى العرضه
وطبعاً ظهر دورى كحكم
وبجد حسيت عندها بنفسى وبدورى المهم اللى إخترته فى اللعبه
بدون قصد
أجى بقى لحل المشكله
الكوره جات جون
ولا فى العرضه
عـــــــــــــرضــــــــــه!!!
هى فين صحيح العرضه دى
اللى بيقولوا الكوره جات فيها
أصلاً الجون محددينه بكومين رمل مش أكتر
يعنى وجود العرضه شئ وهمى
وطبعاً لإننا مش ملتزمين بوقت
فالموضوع طول
وقلتلهم سيبونى أفكر
وفتره التفكير عندى كانت بصراحه
مليانه بالإغراءات
فريق يبعتلى مندوب ويقولى هنسقيكى حاجه ساقعه على حسابنا
وفريق يقولى طلباتك أوامر
وطبعاً لأنى صاحبه مبادئ
لايمكن أغير مبادئ
وفى وسط خناقه الفريقين ودوشتهم
قررت
قررت إيه؟؟؟؟؟؟
إن الكوره جات فى العرضه
أه جات فى العرضه
وكملت التعليق على الماتش
وأنا بمزمز ميراندا
وأكيد إنتوا فهمتوا جات منين
وعقبال المصيف الجاى
28 comments:
نادرا لما بكون صاحب اول تعليق
لكنه حصل الان
ازيك يا منون
عامله ايه
يا رب تكونى بخير
اين انتى من مدونتى المتواضعه
على العموم انا حبيت انى اطمئن على مدونتك الجميله
دمتى بكل خير
حكاية جميلة ورقيقة
دمت بخير
اول مرة اسمع نع حكم بيبيع الماتش بحاجة صقعة بس انا عارف انتى بعتى الماتش لية مش عشان تمزمزى ميرندا
تؤ تؤ تؤ عشان خفتى من سلوى لان اكيد فريقها الى جة فية الجون وكان ممكن تتقتلى فى اسكندرية لو قولتى الكورة جونوطبعأ انتى قولتى اتقى شر سلوى واشرب ميرندا وربنا يسامحنى يعنى هما بيلعبو فى كأس العالم
بسم الله الرحمن الرحيم
ادعوك لزيارة مدونتى
http://ommee.blogspot.com
أهو أنا لسه راجعة من إسكندرية
من الأماكن إللى ذكرياتها مبتتنسيش أبداااااااااااااااااا
تراكات القلعة والمية والبحر والشط والهوا وكلوووووووووو
الكورة جت جوووون على فكرة وإنتى مش واخدة بالك
وحشتينى على فكرة
صالح سعيد
سوووووورى يا صالح
أنا فعلاً مقصره فى التدوين
وفى التعليقات
فتره وهتعدى إن شاء الله
صاحب المضيفه
شكراً كتير على ذوقك
دمت انت بكل خير
اروح لمين
منور يا باشمهدس
أنا لايمكن أخاف من حد
لا تقولى سلوى ولا فاتن
أنا بس كانت عينى فى الحاجه الساقعه
مش اكتر
أنا مره بعت ماتش بساندوتش كبده
(:
زيارتك تشرفنا ورأيك يهمنا
www.eng-mostafa.blogsot.com
طب عدى وسلمى على البلوج بتاعى ولو بنظره بجد مفتقد كلامك للاسف وعارف انك زعلانه لكن برد بتعليق فى بوست كله تفائل ؟
بعد السلام عليكم
اولا ياستى ربنا يديم عليكي حالة التفاؤل دايما
وثانيا
طبعا بعد الميراندا دي أنتى حبيتي منصب الحاكم والمعلق
لأنه منصب بيروى عطشك
هههههههههههههههههه
تحياتي ليكي
والله انتى عسل على الأخر
وبعدين كل ماجى عندك الاقى كده
ربنا يسعدك دايما
انا بقى جيت اطمن وياريت مكنش متأخرة زى كل مرة
ههههههههههههه
و الله شكلها كانت ايام حلوة ... ما هى كل ايام اسكندرية زى العسل
بس بجد حكماية جبارة انتى...مزمز ميرندا
هههههه
تحياتى
موضوعك جميل جدا لانى بموت فى اسكندريه وجمالها حلوه الحاله اللى انت كنتى فيها ويارب تدوم عليكى على طول
يا منوووووووووون
أنا جاوبت على التاج
تعالى شوفيه
ازيك يامنوووووووون
هههههههههههههههههههههههههه
طب مش كنت تقولى للغلبانه صحبتك الل برضه ما كنتش فاهمه حاجه فى الكوره
لدرجة اننا كنت بدخل اجوان فى فريقى
لحد ما قرروا ان محدش هيلعبنى خالص
كنت قوليلى اقعد جنبك
بس تتعوض المره الجايه
قريب طبعاً
سلام لمنونتى
مصطفى أبو زيد
قريت تعليقك اللى فات على موضوع عروسه من غير شبكه
ومبسوطه برأيك
وإن شاء الله هزور مدونتك أكيد
ياريتنى أفتكرت سندوتشات الكبده
اهى كانت احسن من ميراندا 100 مره
أحمد
عـــــــــــلم وإن شاء الله أنفذ
سلاااااام
فزلوكه
طيب راجعه من إسكندريه وخليها فى سرك
لكن تيجى تغيظينى هنا
يبقى كده هتزعلينى يا فزلوكه
اوكى بكره نروح ونيجى نغيظيك
صوت من مصر
خلاص التفاؤل خلص
هنزلك ببوست كله غم وهم
علشان يعبر عن حالتى دلوقت
اروح أكتبه بقى
سلااااام
أبو صلاح
فعلا المنصب بيروى العطش
وبيشبع
بس للأسف ماستفدتش منه غير بالميرانداوبس
كان لازم يكون ليا طلبات أكتر من كده
يالا تتعوض
تمــــــ حنه ـــر
ومين فين مش متأخر
معتقدش فيه حد من المدونين مقصر زى
وعلشان كده بعذر الكل
ربنا يكرمك ياتمر
دينا
فينك يابنتى من زماااااااان
وحشتينا والله
إدعينا نصيف السنه دى
بس إدعى بضمير
اوكى
العراف
حاله التفاؤل راحت لحالها دلوقت
يارب ترجع
إنت فين من زمان
؟
دودو
تتعوض ؟
دا إنت طموحك عالى يادودو
كل سنه وإنت طيبه
بسم الله الرحمن الرحيم
حقيقى قصة جميله ممكن نستفيد منها عدة أشياء
أولا : لا يجب أن يدخل الإنسان منا نفسه فيما لا يعلم
ثانيا : ثانيا الحكم بين الناس شىء صعب يحتاج إلى خبرة وحكمة
ثالثا : ضمير الإنسان أكبر من مشروب بارد
رابعا : الألم النفسى الذى يعيشة الحاكم الظالم اشد من الألم الناشىء من كلمة لا أستطيع التحكيم
خامسا : نظرة المجتمع إلى الفرد الظالم تظل تطارده
سادسا : استبعاد هذا الشخص الذى يحكم لصالح من يمنحه المشروب البارد من التحكيم فى المستقبل يشكل ألما اجتماعيا ونفسيا عميقا
كنت أتوقع الاعتراف بعدم القدرة على التحكيم والتراجع عنه وأظنها كانت نهاية ترضينى فى شخصيتك الرقيقة الطريفة
أحمد
والله وصلتلى إحساس عالى بالذنب
على حاجه حصلت من 3 أو 4 سنين
بس عذرى الوحيد إننا كنا واخدين الموضوع تهريج مش أكتر
مش لو كنتى ركزتى كويس مكنتيش خدتى رشوة
انا لو مكانك كنت اقوللهم عيدوها تانى
Post a Comment